ABŞ Ədliyyə Nazirliyi mayın 23-də Ağ Ev yaxınlığında baş verən atışmanı Prezident Donald Trampa qarşı sui-qəsd cəhdi adlandırıb. Bu barədə paytaxt Kolumbiya dairəsinin federal məhkəməsinə təqdim edilən vəsatətdə bildirilir.
Oxu.Az-ın məlumatına görə, sənəd məhkəmənin elektron bazasına daxil edilib. Sənəddə hadisə "bir ay ərzində prezidentə qarşı ikinci sui-qəsd cəhdi" kimi qiymətləndirilib.
Rəsmi məlumata əsasən, mayın 23-ü axşam saatlarında silahlı şəxs Ağ Evin yaxınlığında atəş açıb. ABŞ Məxfi Xidməti əməkdaşları cavab atəşi ilə onu zərərsizləşdiriblər. Şəxs xəstəxanada ölüb. Atışma zamanı bir yoldan keçən də yaralanıb.
KİV-in məlumatına görə, atəş Ağ Evdən təxminən 150 metr məsafədən açılıb. Silahlı şəxsin psixi pozuntulardan əziyyət çəkdiyi bildirilir.
ABŞ baş prokuroru səlahiyyətlərini icra edən Todd Blanş tərəfindən imzalanan sənəddə qeyd olunur ki, yenidən silahlı şəxs prezidenti, ailəsini və köməkçilərini öldürməyə cəhd edib.
Nazirlik hesab edir ki, bu hadisə yeni banket zalının zəruriliyini göstərir. Ağ Evdə ən müasir təhlükəsizlik sistemləri ilə təchiz edilmiş zalın tikintisi məsələsi məhkəmədə müzakirə olunur.
Əvvəlki oxşar hadisə aprelin 25-də "Washington Hilton" hotelində baş vermişdi. O zaman silahlı şəxs saxlanılmış və ona prezidentə sui-qəsd cəhdində ittiham irəli sürülmüşdü.
Məhkəmə 2026-cı ildə Konqresin icazəsi olmadan banket zalının tikintisini qismən dayandırmaq qərarı verib. Prezident bu qərarla razılaşmadığını bildirib.
