İran və ABŞ arasında yeni saziş layihəsi bütün cəbhələrdə hərbi əməliyyatların dayandırılmasını nəzərdə tutur.
"Əl-Ərəbiyyə" 10 bənddən ibarət sənədin tam versiyasını dərc edib.
Saziş aşağıdakıları nəzərdə tutur:
1. Quru, dəniz və hava da daxil olmaqla, bütün cəbhələrdə dərhal, hərtərəfli və qeyd-şərtsiz atəşkəs;
2. Hərbi, mülki və ya iqtisadi infrastruktura zərbələr endirilməməsi ilə bağlı qarşılıqlı öhdəlik;
3. Hərbi əməliyyatlara və informasiya müharibəsinə son qoyulması;
4. Suverenliyə, ərazi bütövlüyünə hörmət və ölkələrin daxili işlərinə müdaxilə edilməməsi;
5. Fars körfəzi, Hörmüz boğazı və Oman körfəzində gəmi nəqliyyatının azad edilməsi;
6. İcranın monitorinqi və mübahisələrin həlli üçün birgə mexanizm;
7. Yeddi gün ərzində həll olunmamış məsələlər üzrə danışıqların keçirilməsi;
8. İranın sazişin şərtlərinə sadiq qalması müqabilində ABŞ sanksiyalarının tədricən aradan qaldırılması;
9. Sazişin beynəlxalq hüquqa və BMT Nizamnaməsinə uyğunluğu;
10. Sənədin hər iki tərəf rəsmi elan etdikdən dərhal sonra qüvvəyə minməsi.
"Əl-Ərəbiyyə" mənbələrinə görə, layihənin yekun variantı yaxın saatlarda elan ediləcək. Sənəddə İranın nüvə silahlarından bəhs edilmir.
Xatırladaq ki, İran və ABŞ arasında 8 apreldən atəşkəs qüvvədədir. ABŞ Prezidenti Donald Tramp İranın nüvə silahlarından imtina etdiyini iddia edib.
