ABŞ Prezidenti Donald Trampın Administrasiyası İsraillə operativ kəşfiyyat məlumatlarının mübadiləsinin həcmini ciddi şəkildə artırmağı hədəfləyir.
Oxu.Az xəbər verir ki, bu barədə "The Independent" nəşri məlumat yayıb. Məqalədə qeyd olunur ki, Birləşmiş Ştatlar İsraillə müdafiə və kəşfiyyat sahəsində əməkdaşlığı xeyli genişləndirən və ingilisdilli "Beş göz" casus şəbəkəsini kölgədə qoyan yeni qanun layihəsini irəli sürür.
Sözügedən sənədin maddələrindən biri hər iki dövlətin xüsusi xidmət orqanları arasındakı mövcud sıx əlaqələrin daha da inkişaf etdirilməsini nəzərdə tutur. Bu isə İsrailə Birləşmiş Ştatların kəşfiyyat icmasında qorunan ən məxfi sənədlərə daxil olmaq imkanı yaradacaq.
ABŞ-nin Avstraliya, Kanada, Yeni Zelandiya və Böyük Britaniyanın da yer aldığı "Beş göz" kəşfiyyat alyansının üzvü olduğunu nəzərə alsaq, İsrail həmin ölkələrin xüsusi xidmət orqanlarından da məlumat əldə edə biləcək.
Nəşr vurğulayır ki, bununla da ABŞ və onun müttəfiqlərindən gələn ən mühüm kəşfiyyat xəbərləri İsrail xüsusi xidmət orqanları tərəfindən öz məqsədləri üçün istifadəyə açıq olacaq.
Digər tərəfdən, "N12" telekanalına müsahibəsində D.Tramp bildirib ki, İran tərəfindən ola biləcək yeni hücumlar zamanı yardımdan imtina oluna biləcəyi ilə bağlı İsrailin Baş naziri Benyamin Netanyahuya xəbərdarlıq edib. Trampın sözlərinə görə, ABŞ və İran arasında vasitəçilik səylərində iştirak edən regionun beş ölkəsi ondan Netanyahuya təzyiq göstərməyi xahiş edib. Məqsəd İsrailin İrana hücumları dayandırması və sülh razılaşması istiqamətində irəliləyişə nail olmaqdır.
