ABŞ vətəndaşı Tomas Veyr Pauken Birləşmiş Ştatlar ərazisində xarici hökumətin agenti kimi fəaliyyət göstərdiyini və Çin Xalq Respublikasının xüsusi xidmət orqanlarının tapşırıqlarını yerinə yetirdiyini etiraf edib.
Oxu.Az xəbər verir ki, bu barədə ABŞ Ədliyyə Nazirliyi məlumat yayıb.
50 yaşlı amerikalı təxminən 15 il Çində yaşayıb və jurnalistika ilə məşğul olub. O, Tomas Makqreqor təxəllüsü ilə Çin mətbuatında məqalələr yazıb və televiziyada ekspert kimi çıxış edib. FTB-yə görə, 2019-2026-cı illərdə Çin xüsusi xidmət orqanlarının tapşırıqlarını icra edib.
Onun kuratoru Keyti adlı qadın olub. O, Paukenə Çin kəşfiyyatının potensial hədəfləri ilə görüşlər təşkil etməyi tapşırıb. Pauken həmin şəxslərə rabitə cihazları verib, Çin kəşfiyyatı ilə əlaqə yaratmaqda vasitəçi olub.
Bu fəaliyyətlərinə görə Pauken ən azı 100 min dollar alıb. Keyti həmçinin onun ABŞ-yə səfərlərini maliyyələşdirib. FTB tərəfindən dindiriləndən sonra sərbəst buraxılan Pauken növbəti səfərində həbs edilib. Maksimum cəza 10 il həbsdir. Məhkəmə sentyabrın 1-də keçiriləcək.
