Çində ABŞ vətəndaşı Yu Min Zin casusluq və milli təhlükəsizliyə təhdid şübhəsi ilə saxlanılıb.
Oxu.Az xəbər verir ki, bu barədə "Reuters" Çin Xarici İşlər Nazirliyinin rəsmi nümayəndəsi Lin Szyanın brifinqdə verdiyi açıqlamaya əsasən məlumat yayıb.
Xanım Szyan saxlanılmanı təsdiqləyib. O, jurnalistlərin "New York Times"ın ötən həftə cənab Zinin Kunmin şəhərində itkin düşməsi barədə sualını cavablandırıb. XİN nümayəndəsi əlavə edib ki, Çin hakimiyyəti məcburetmə tədbiri barədə ABŞ-nin Quançjoudakı baş konsulluğuna məlumat verib.
İyunun 11-də "New York Times" mənbələrə istinadən bildirmişdi ki, Çin hakimiyyəti Myanma Strategiya və Siyasət İnstitutunun təsisçisi, ABŞ vətəndaşı Yu Min Zini milli təhlükəsizliyə təhdid ittihamı ilə saxlayıb. Alim iyunun 3-də Yunnan vilayətinin inzibati mərkəzi Kunmin şəhərində itkin düşmüşdü.
