Hindistanın "Adani Enterprises" şirkəti İrana qarşı ABŞ sanksiyalarının pozulması ilə bağlı iddiaları həll etmək üçün Vaşinqtona 275 milyon dollar ödəməyə razılaşıb.
Oxu.Az-ın TASS-a istinadən verdiyi xəbərə görə, bu barədə ABŞ Maliyyə Nazirliyinin Xarici Aktivlərə Nəzarət İdarəsi məlumat yayıb. Şirkət bu addımı mümkün məhkəmə iddiasının qarşısını almaq üçün atıb.
ABŞ tərəfi iddia edir ki, şirkət 2023-cü ilin noyabrından 2025-ci ilin iyununadək Dubaydakı treyder vasitəsilə İrandan mayeləşdirilmiş səmt qazı alıb. Həmin yanacaq Oman və İraq mənşəli kimi göstərilib. ABŞ-dəki maliyyə institutları bu əməliyyatlarda iştirak edib, ümumi məbləğ 192 milyon dolları ötüb.
"Adani Enterprises" Hindistanın iri sənaye konqlomeratı "Adani Group"un əsas şirkətidir. Qrup enerji, kənd təsərrüfatı və müdafiə sahələrində fəaliyyət göstərir, 14 dəniz limanı və yeddi hava limanına sahibdir.
