İyunun 11-də start götürəcək dünya çempionatında oyunçular ciddi sağlamlıq təhlükəsi ilə üz-üzə qala bilər. Tibb, iqlim və idman sahəsindən 20-dən çox mütəxəssis bu barədə xəbərdarlıq edib.
FIFA-ya ünvanlanan açıq məktubda ekspertlər isti hava şəraitində tətbiq edilən tədbirləri yetərsiz adlandırıb. Onlar ekstremal iqlim şəraitində oynayan idmançıların sağlamlığının qorunması siyasətinə təcili yenidən baxılmasını tələb ediblər.
Alimləri xüsusilə ABŞ və Meksikadakı matçlar narahat edir. 16 stadiondan 14-də havanın temperaturu təhlükəli həddi aşa bilər. İyun və iyulda ABŞ-nin cənub və Meksikanın şimal bölgələrində orta temperatur 30-35°C, bəzən 40°C-yə çatır.
Təkliflərə görə, WBGT 28°C-ni keçdikdə matçlar axşama və ya başqa günə təxirə salınmalıdır. Həmçinin, sərinləmə fasilələri 3 dəqiqədən 6 dəqiqəyə qədər uzadılmalı və hakimlərin də qayğısına qalınmalıdır.
