Almaniya Federal Polisinin xüsusi təyinatlı qüvvələrinin əməkdaşı Şlezviq-Holşteyn federal torpağında yerləşən hərbi poliqonda atəş təlimi zamanı həlak olub.
Oxu.Az-ın TASS-a istinadən verdiyi məlumata görə, bu barədə Lübek polis idarəsi bildirib.
Hadisə Oldenburq yaxınlığındakı Putlos poliqonunda baş verib. Polis hadisənin təfərrüatını açıqlamasa da, təlim atışı zamanı ölümcül yaralanma olduğunu təsdiqləyib.
Lübek polisi və prokurorluğu araşdırmaya başlayıb. İlkin nəticələr bədbəxt hadisəyə işarə edir.
Putlos poliqonu Baltik dənizi sahilində yerləşir və 1200 hektardan çox ərazini əhatə edir. Burada adi silah təlimləri ilə yanaşı, artilleriya, tank əleyhinə sursatlar və hava hücumundan müdafiə sistemləri sınaqdan keçirilir. Obyektdən regional və federal polis də istifadə edir.
