ABŞ Hərbi Hava Qüvvələrinə məxsus B-52 Stratofortress strateji bombardmançı təyyarəsinin Kaliforniyada qəzaya uğraması ilə bağlı yeni detallar ortaya çıxıb. Məlum olub ki, qəza zamanı təyyarənin göyərtəsində Boeing aerokosmik korporasiyasının iki əməkdaşı olub.
Hadisə ötən gün Edvards aviabazasından havaya qalxdıqdan dərhal sonra baş verib. Qəzanın səbəbləri hələlik açıqlanmasa da, xilasetmə əməliyyatları davam edir. Boeing şirkəti isə əməkdaşlarının təyyarədə hansı vəzifəni yerinə yetirdiyi barədə məlumat verməyib.
B-52 Stratofortress, Boeing tərəfindən hazırlanmış və 1955-ci ildən ABŞ ordusunda xidmət edən çoxməqsədli bombardmançıdır. Nüvə və adi zərbələr endirmək qabiliyyətinə malik olan təyyarənin heyəti 5 nəfərdən ibarətdir və havada yanacaqdoldurma olmadan 14 min km-dən çox məsafə qət edə bilir.
