Cənubi Koreyanın Milli Müdafiə Naziri An Gyu Bak, Şimali Koreya ilə sərhədyanı zonada yaşayan sakinlər üçün məhdudiyyətlərin yumşaldılması planını açıqlayıb.
Oxu.Az "Yonhap" agentliyinə istinadən xəbər verir ki, ordu sıralarında şəxsi heyətin azalması fonunda təhlükəsizlik tələblərinə uyğunlaşmaq məqsədilə Mülki Nəzarət Xəttinə (CCL) yenidən baxılması layihəsi hazırlanıb.
Rəsmi Seul, mülki əhalinin girişinə qadağa qoyulan ərazilərin miqyasını kiçiltməyi hədəfləyir. Hərbi Demarkasiya Xəttindən (MDL) 10 km cənubda yerləşən CCL-in təqribən 6 km şimala sürüşdürülməsi nəzərdə tutulur. Bununla, vətəndaşların sərbəst hərəkəti üçün əlavə 270 km² ərazi açılacaq.
Bundan əlavə, Məhdud Mühafizə Zonasındakı 450 km² ərazidə qadağalar ləğv ediləcək. Kanvondo əyalətinin sərhəd bölgələrindəki 23 kənd və qəsəbədən köhnə hərbi obyektlərin sökülməsi də planlaşdırılır.
