Cənubi Koreyada it ətinin istehsalı və satışına qoyulan qadağa fonunda bu məhsula alternativ tapılıb.
Oxu.Az xəbər verir ki, bu barədə "RİA Novosti"yə həmin qidanı istehlak edən yerli sakin məlumat verib.
Agentliyin müsahibi keçi ətinin dadına görə it ətinə çox bənzədiyini bildirib. Onun sözlərinə görə, xarakterik qoxunu aradan qaldırmaq üçün bişirilmə prosesində ədviyyatlardan istifadə etmək lazımdır.
Müsahib əlavə edib ki, ölkə artıq "it ətindən sonrakı" dövrə hazırlıq görür. Xüsusən də, Cənubi Koreyada qara keçilərin yetişdirilməsi ilə məşğul olan təsərrüfatların sayında nəzərəçarpacaq dərəcədə artım müşahidə olunur.
Yanvarın 9-da Cənubi Koreya parlamenti qida məqsədilə itlərin yetişdirilməsini və kəsilməsini qadağan edən qanun qəbul edib. Qanun layihəsi, həmçinin it əti istehsalı ilə məşğul olan şəxslərə işlərini dəyişə bilmələri üçün subsidiyaların verilməsini də nəzərdə tutur.
Qadağa 2027-ci ildən qüvvəyə minəcək. Bundan sonra qaydanı pozanları üç ilə qədər həbs və ya 30 milyon vona (22 700 dollar) qədər cərimə gözləyir.
Cənubi Koreya hökumətinin statistikasına əsasən, ölkədə təxminən 1 150 it ferması, 34 ət emalı müəssisəsi, 219 distribütor və it ətindən hazırlanmış yeməklər satan 1 600-ə yaxın restoran fəaliyyət göstərir. Qeyd edək ki, əvvəllər it əti Koreya milli mətbəxinin ayrılmaz bir hissəsi hesab olunurdu.
