Çexiya Konstitusiya Məhkəməsi Prezident Petr Pavelin iddiasını təmin edib.
Baş nazir Andrey Babişin rəhbərlik etdiyi hökumət dövlət başçısının iyulda keçiriləcək NATO sammitində iştirakını təmin etməli olacaq.
Bu barədə "Aktuálně.cz" nəşri məlumat yayıb.
İyunun 24-də keçirilən iclasda Konstitusiya Məhkəməsi qərara alıb ki, Nazirlər Kabineti prezidentin NATO sammitində Çexiya nümayəndə heyətinə qoşulmasına şərait yaratmalı, zəruri əməkdaşlığı və bütün təşkilati məsələləri təmin etməlidir.
Hakimlər vurğulayıblar ki, prezidentlərin NATO sammitlərində iştirakı uzun illər ərzində formalaşmış dövlət praktikasıdır.
Qərar dövlət başçısı ilə hökumət arasında bir neçə aydır davam edən mübahisədən sonra qəbul olunub.
Babiş hökuməti nümayəndə heyətinə baş nazirin özü, müdafiə naziri və xarici işlər nazirinin rəhbərlik edəcəyinə qərar vermişdi. Bu isə Prezidentin məhkəməyə müraciətinə səbəb olmuşdu.
Pavel bildirib ki, dövlətin xaricdə təmsil olunması onun konstitusion səlahiyyətlərindəndir.
