Çin 2030-cu illərin ortalarınadək dünyanın ən böyük astronomiya mərkəzini yaratmağı planlaşdırır.
Layihə Tsinxay əyalətində, Sayşiten dağının zirvəsində həyata keçiriləcək. Hazırda orada Yer kürəsinin ən güclü optik teleskoplarından biri tikilir.
Oxu.Az "South China Morning Post" nəşrinə istinadən xəbər verir ki, Pekindəki Çin Milli Astronomiya Rəsədxanalarının baş elmi rəhbəri Den Litsay bildirib: "Burada diametri 6,5 metrdən 14,5 metrədək olan teleskoplar və onlarla kiçik müşahidə aparatı fəaliyyət göstərəcək."
"Onların ümumi işıq toplama qabiliyyəti Havay adalarındakı Mauna-Kea zirvəsindəki teleskopları üstələyəcək", - deyə o qeyd edib.
14,5 metrlik Böyük Optik Teleskop (LOT) və 6,5 metrlik çoxobyektli araşdırma teleskopu (MUST) üçün artıq ərazinin hazırlanması, güzgülərin cilalanması və avadanlıqların işlənib hazırlanmasına başlanılıb. Hər iki teleskopun 2030-cu ilə qədər istismara verilməsi planlaşdırılır.
