Çin məhkəməsi "Louis Vuitton Malletier" şirkətinin əmtəə nişanından qanunsuz istifadəyə görə "Molly Tea" çay istehsalçısını 10.3 milyon yuan (təxminən 1.5 milyon dollar) təzminat ödəməyə məhkum edib.
Oxu.Az-ın məlumatına görə, bu barədə "Fengmian" nəşri yazıb. Çin şirkəti qərardan şikayət etməyi planlaşdırır.
Suzhou şəhər məhkəməsi müəyyən edib ki, südlü çay istehsalçısı və onun filialı Louis Vuitton-a məxsus yeddi əmtəə nişanı üzrə müstəsna hüquqları pozub.
Məhkəmə qərarına əsasən, Fransa brendinə dəymiş ziyana görə 10 milyon yuan, hüquq müdafiəsi xərclərinə görə 300,000 yuan (təxminən 44,200 dollar) ödənilməlidir. Mağazanın özü də 100,000 yuan (təxminən 14,700 dollar) kompensasiya ödəyəcək. "Molly Tea" həmçinin əmtəə nişanı ilə bağlı rəsmi bəyanat yaymalıdır.
Xatırladaq ki, "Louis Vuitton Malletier" 2025-ci ilin mayında "Molly Tea"-yə qarşı iddia qaldırmışdı. Buna səbəb Çin şirkətinin loqotipindəki dördləçəkli gül forması ilə Louis Vuitton-un firmasının ornamenti arasındakı oxşarlıq olub.
