Çinin Şensi əyalətində yaşayan Şen soyadlı şəxs yeni tikilidən mənzil almaq istəyərkən qəribə bir fırıldaqla üzləşib.
Məlumata görə, 2013-cü ildə Sian şəhəri yaxınlığında tikilən binanın 34-cü mərtəbəsində 90 kvadratmetrlik mənzil alan Şen, 117,700 yuan (təxminən 28,000 manat) ilkin ödəniş edib. Tikinti şirkəti mənzili 2015-ci ildə təhvil verəcəyini vəd edib.
Lakin tikinti gecikib və şirkət binanı yalnız 2017-ci ildə tamamlayıb. Açarları almağa gedən Şen, binanın cəmi 32 mərtəbəli olduğunu görüb. Şirkət əvvəlcə başqa mərtəbədə mənzil təklif etsə də, sonra bu variantın da mümkünsüz olduğunu bildirib.
Şen pulunu geri istəyəndə şirkət yalnız bir hissəsini qaytarıb, sonra isə əlaqəni kəsib. Məhkəmə alıcının lehinə qərar verərək şirkətin qalan məbləği də qaytarmasını tələb edib.
