İngiltərə Bankı yeni funt sterlinq əsginaslarının dizaynı üçün ictimai müzakirələrə başlayıb. Təklifə əsasən, keçmiş baş nazir Uinston Çörçillin yerini 18 endemik vəhşi heyvan növü, o cümlədən bayquş, böyük əyridimdik, Atlantik tupiki və qurbağa ala bilər.
Oxu.Az TASS-a istinadən xəbər verir ki, vətəndaşlar 3 iyundan etibarən poçt və ya rəsmi dövlət portalı vasitəsilə onlayn səsvermədə iştirak edə bilərlər. Seçicilər üç kateqoriyadan (məməlilər, quşlar, suda-quruda yaşayanlar, həşəratlar və balıqlar) iki heyvan növü təklif edəcək. Səsvermə iyulun 3-dək davam edəcək.
Yeni dizaynlar 5, 10, 20 və 50 funtluq əskinaslarda tətbiq olunacaq. Mərkəzi Bank vurğulayıb: "Dörd fərqli kupyurada İngiltərənin müxtəlif təbii ekosistemlərini simvolizə edən heyvanlar olmalıdır. Buna görə də bank ən çox səs toplayan dörd növü mütləq seçməyə bilər. Rəy rəhbər Endryu Beyli tərəfindən dəyərləndiriləcək."
Hazırda Britaniya pullarının üzərində Uinston Çörçill (1874-1965), Ceyn Ostin (1775-1817), Uilyam Törner (1775-1851) və Alan Türinqin (1912-1954) rəsmləri var. Bank yekun qərarını ilin sonuna qədər açıqlayacaq. Yeni pul nişanlarının hazırlanması illər çəkə bilər, lakin gələcək əskinaslarda fəaliyyətdə olan monarxın şəkli mütləq yer alacaq.
