Avstraliyada çəkisi bir tondan çox olan Nil adlı məşhur dəniz fili sahilyanı şəhərin sakinlərinin rahatlığını pozaraq nəqliyyatın hərəkətini tamamilə dayandırıb.
Oxu.Az mk.ru-ya istinadən xəbər verir ki, nəhəng məməli çimərliyin yaxınlığındakı hərəkətli yolayrıcında uzanıb və yol nişanı dirəklərini aşırıb.
Hadisə yerinə təcili olaraq vəhşi təbiətin mühafizəsi üzrə mütəxəssislər çağırılıb və onlar böyük çətinliklə heyvanı təhlükəsiz əraziyə köçürə biliblər.
Qeyd edək ki, Nil artıq bir neçə ildir yerli kommunal xidmətlər və sürücülər üçün problem yaradır. O, dincəlmək üçün adət etdiyi kimi məhz bu hərəkətli ərazini seçir, mütəmadi olaraq hasarları zədələyir, yol konuslarını çeynəyir və kilometrlərlə uzanan tıxaclara səbəb olur.
Yaratdığı narahatlıqlara baxmayaraq, qanunla dəniz filinə yaxınlaşmaq və ya onu özbaşına qovmağa cəhd etmək qəti qadağandır və həyati təhlükə yaradır. Mütəxəssislər xəbərdarlıq edirlər ki, bu nəhəng heyvanın təsadüfi ani hərəkəti belə insana çox ağır xəsarətlər yetirə bilər.
