Böyük Britaniya, Almaniya, İtaliya və Fransa liderləri İranın nüvə fəaliyyətini tam şəffaf şəkildə həyata keçirəcəyi təqdirdə sanksiyaların ləğvinə hazır olduqlarını bildiriblər.
AFP-nin məlumatına görə, dörd ölkənin rəhbərləri İranla ABŞ arasında əldə olunan razılaşmanı müsbət qiymətləndirərək birgə bəyanat yayıblar.
Sənəddə qeyd olunur ki, "Dördlər qrupu" İranın nüvə proqramı çərçivəsində atacağı aydın və yoxlanılabilən addımlara cavab olaraq məhdudiyyətləri aradan qaldırmaq niyyətindədir.
Liderlər Tehranın nüvə silahı əldə etməsinin qarşısını almaq üçün ABŞ, İran və Beynəlxalq Atom Enerjisi Agentliyi (BAEA) ilə əməkdaşlıq imkanlarını nəzərdən keçirdiklərini vurğulayıblar.
Qeyd edək ki, ABŞ, İran və Pakistan rəsmi şəxsləri Vaşinqtonla Tehran arasında razılaşmanı təsdiqləyiblər. Sənədin iyunun 19-da Cenevrədə imzalanması planlaşdırılır.
