Baku TV-də yayımlanan "Hərbi xronika"nın son buraxılışında Ermənistan Silahlı Qüvvələrindəki kadr dəyişiklikləri və Milli Müdafiə Tədqiqat Universitetinə rəis təyinatı təhlil edilib.
Ən diqqətçəkən məqam polkovnik Artsrun Ovannisyanın bu vəzifəyə təyin olunmasıdır. O, 44 günlük müharibədən sonra həm Ermənistanda, həm də Azərbaycanda "Gopçu Artsrun" kimi tanınır.
2016-cı ildə yaradılan Milli Müdafiə Tədqiqat Universiteti strateji təhsil proqramları təşkil edir və regional təhlükəsizlik sahəsində araşdırmalar aparır.
Bu "beyin mərkəzi" NATO proqramı çərçivəsində dəstək alıb, Harvard və "Chatham House" kimi qurumlarla əlaqələr qurub.
Ovannisyan artilleriya zabiti olsa da, 2020-ci il müharibəsi zamanı Ermənistan Müdafiə Nazirliyinin brifinqlərini aparıb. O, Azərbaycan Ordusunun irəliləyişi qarşısında erməni qoşunlarının qaçışını "taktiki geriçəkilmə" adlandırıb və yalanlar yayıb.
Müharibədən sonra bu yalanları etiraf edərək istefa verən Ovannisyanın yenidən rəhbər vəzifəyə gətirilməsi böyük maraq doğurub.
