Avropada müdafiə məhsullarının qiyməti son iki ildə 50%-dən çox artıb. Bu barədə Estoniyanın müdafiə naziri Hanno Pevkur Bloomberg-ə açıqlamasında bildirib.
“İki il əvvəl aldığımız məhsulların alış həcmini indi artırmaq istəyəndə görürük ki, həmin məhsulların qiyməti artıq 50-60% yüksəlib”, - deyə nazir qeyd edib.
Nazirin sözlərinə görə, silah və hərbi texnikanın bahalaşması NATO-nun müdafiə xərclərini artırmaq planlarını çətinləşdirir.
Pevkur bildirib ki, ABŞ-nin iştirakının azalması fonunda Avropa həm sürətlə yenidən silahlanmağa, həm də Ukraynaya dəstəyin böyük hissəsini üzərinə götürməyə məcbur qalır.
Nazir Avropanın müdafiə sənayesində istehsalın genişləndirilməsi ilə bağlı problemlərin də olduğunu vurğulayıb. O deyib ki, şirkətlər uzunmüddətli dövlət müqavilələri olmadan istehsal gücünü artırmağa investisiya qoymağa hazır deyillər.
