Filippinin Anxeles şəhərində tikilməkdə olan doqquzmərtəbəli binanın uçması nəticəsində həlak olanların sayı 11 nəfərə çatıb. Daha 14 nəfər itkin düşüb.
Oxu.Az xəbər verir ki, bu barədə "GMA News" telekanalı məlumat yayıb.
Fövqəladə xidmətlər uçmuş binanın qalıqlarını sökərək axtarış-xilasetmə əməliyyatlarını davam etdirirlər.
Şəhər administrasiyasının mətbuat xidmətinin rəhbəri Cey Pelayo daha əvvəl bildirmişdi ki, bina mayın 24-nə keçən gecə uçub və onlarla tikinti işçisi dağıntılar altında qalıb. Təxminən 10 nəfər hadisə yerini özü tərk edə bilib. Hadisənin ilk saatlarında daha 26 nəfər xilas edilib.
