Böyük Britaniyanın paytaxtı Londonda televiziya prodüseri Meq Fozzard həkimlərin səhlənkarlığı üzündən yerimə qabiliyyətini itirib.
Hadisə ürəyi dayandığı zaman çağırışa gələn tibbi briqadanın defibrilyatorun düyməsini səhv basması ilə baş verib. Bu səbəbdən həyati əhəmiyyət daşıyan vaxt itkisi yaranıb.
Oxu.Az "Mirror"a istinadən xəbər verir ki, məhkəmə sənədlərinə əsasən, səhiyyə işçiləri elektrodların yerini səhv salaraq yanlış cihazları birləşdiriblər. Bu kobud xəta üzündən xəstəyə lazım olan elektroşok səkkiz dəqiqə gecikib.
Meqin həyat yoldaşı Xander Font Freyde qorxu içində təcili yardıma zəng vurduğunu və həkimlər gələnə qədər ürək masajı etdiyini bildirib.
Bildirilib ki, qadının ürək çatışmazlığına əvvəlcədən təyin olunmamış xəstəlik səbəb olub. 33 yaşlı televiziya işçisi indi nitq problemi yaşayır. O, Milli Səhiyyə Xidmətini məhkəməyə verərək prosesi qazanıb və məbləği gizli saxlanılan kompensasiya alıb.
Fiziki məhdudiyyətlərinə baxmayaraq, Meq yarımştat işinə qayıdıb və əlavə olaraq akrobatika ilə məşğul olmağa başlayıb.
