İran ətrafında gərginlik və Hörmüz boğazının blokadaya alınması ehtimalı Avropada dərman çatışmazlığına səbəb ola bilər.
Oxu.Az "La Tribune" nəşrinə istinadən xəbər verir ki, Avropa əczaçılıq sənayesi xammal tədarükündə 80% Çin və Hindistandan asılıdır. Bu ölkələrin əczaçılıq sektoru neft və qaz qiymətlərindəki qeyri-sabitlik səbəbindən çətinlik çəkir. Asiya və Yaxın Şərqdə aviauçuşların ləngiməsi təchizat zəncirini pozub.
CEPII İqtisadi Tədqiqatlar Mərkəzinin nümayəndəsi Dəniz Yünal deyir: "Alternativ çatdırılma yolları olsa da, xərclər çox yüksəkdir. Bəzi maddələrin təchizat zənciri o qədər mürəkkəbdir ki, zamanla defisit yarana bilər."
Məqalədə qeyd olunur ki, etilen, karbamid və parafin kimi komponentlər birbaşa Fars körfəzi ölkələrindən gətirilir. "Coface" sığorta şirkətinə görə, ilk növbədə bəzi antibiotiklər və parasetamol risk altındadır. Şirkət təmsilçisi Co Duayi bildirib: "Bir neçə avrosentə satılan dərmanlar neftdən asılıdır. Sistem təzyiqə məruz qaldıqda təkcə qiymətlər artmır, bəzi maddələrin fiziki tədarükü də çətinləşir."
Daha əvvəl "Le Parisien" İrandakı böhran səbəbindən Fransada tikinti materiallarının qiymətinin kəskin artdığını yazmışdı.
