Hörmüz boğazında İran və ABŞ qüvvələri arasında qarşılıqlı zərbələr səbəbindən Tehran Vaşinqtonla iyunun 28-nə planlaşdırılan texniki danışıqları ləğv edib.
IRIB telekanalı İranın sabiq ali rəhbərinin ofisinin üzvü Həbibullah Fəzailiyə istinadən yayıb.
"Bu gün texniki danışıqlar baş tutmalı idi, lakin İran iştirakdan imtina etdi, görüş ləğv olundu. Buna səbəb son günlər həyata keçirilən qarşılıqlı zərbələrdir", - deyə Fəzaili bildirib.
Onun sözlərinə görə, danışıqların bərpasından əvvəl Tehran dondurulmuş aktivlərə çıxışın təmin olunması da daxil olmaqla bir sıra şərtlərin icrasında israr edir.
İranın xarici işlər naziri Abbas Əraqçı əvvəlcədən bildirib ki, Hörmüz boğazındakı vəziyyətə müdaxilə gərginliyi artıracaq.
SEPAH ABŞ zərbələrinə cavab olaraq iyunun 28-də Küveyt və Bəhreyndəki ABŞ hərbi obyektlərinə raket və PUA hücumu edib. ABŞ hərbçiləri isə Hörmüz boğazı ətrafında İranla əlaqəli obyektlərə zərbələr endirib.
