Satoşi dövrünün ilk Bitcoin maynerlərindən biri 203 milyon dollar dəyərində kriptovalyutanı iki böyük kriptobrokerə köçürüb.
Onchain Lens platformasının Arkham analitik şirkətinə istinadən verdiyi məlumata görə, kriptobalina 2 650 BTC-ni üç tranzaksiya ilə FalconX və Cumberland-ə göndərib. Köçürmənin satış məqsədli olub-olmadığı bilinmir, lakin belə aktivlik iri sövdələşmələrdən əvvəl müşahidə olunur.
Analitiklərə görə, ən qədim Bitcoin sahiblərindən birinin pul kisəsində hələ də 6 000 BTC (462 milyon dollar) qalır.
Satoşi dövrü 2009-2011-ci illəri əhatə edir. O zaman Bitcoin-lər ev kompüterlərində hasil edilir, hər blok üçün 50 BTC mükafat verilirdi və demək olar ki, dəyərsiz idi. Laslo Haneç 2010-cu ildə 10 min BTC ilə iki pizza almışdı (40 dollar). Bu gün həmin Bitcoin 770 milyon dollar dəyərindədir.
Bu balina isə 15 il toxunulmaz saxladığı aktivini satarsa, böyük mənfəət əldə edəcək.
