İndoneziyanın şərqindəki Dağlıq Papua əyalətində separatçıların hücumu nəticəsində səkkiz qızılaxtaran öldürülüb.
"Jakarta Globe" qəzeti hərbçilərə istinadən bildirir ki, hücumu "Azad Papua Hərəkatı"nın üzvləri həyata keçirib. Onlar mülki şəxsləri İndoneziya təhlükəsizlik qüvvələrinə casusluq etməkdə ittiham ediblər.
Rəsmilər vurğulayır ki, ölənlər hərbçi deyil, qızıl axtaran mülki şəxslər olub. Separatçılar hadisə yerini tərk edib. Hərbçilər əlavə qüvvələr və helikopterlər göndərərək bölgədə patrulu gücləndirib. Cəsədlərin təxliyəsi davam edir.
Qeyd edək ki, İndoneziya 1969-cu ildə Qərbi Yeni Qvineyanı ilhaq edib. Separatçılar təbii sərvətlərlə zəngin bölgənin müstəqilliyi uğrunda mübarizə aparır.
