İran Hərbi Dəniz Qüvvələri Oman körfəzində özəl mühafizə şirkətləri tərəfindən istifadə edilən "üzən arsenal" gəmisini ələ keçirib. Gəmi İranın ərazi sularına doğru yönləndirilib.
BBC telekanalı "Vanguard" şirkətinə istinadən xəbər verir ki, söhbət Honduras bayrağı altında üzən "Hui Chuan" gəmisindən gedir. Gəmi operatorları bu gəmidən ticarət gəmilərini qoruyan şirkətlər üçün sursat və hərbi avadanlıq anbarı kimi istifadə ediblər.
İranlılar gəminin göyərtəsində kimlərin və nələrin olduğu barədə məlumat verməyib. Bu cür üzən arsenallar Qırmızı dənizdə, Ədən və Oman körfəzlərində geniş istifadə olunur. "Hui Chuan" silah və avadanlıq saxlamaqla yanaşı, özəl mühafizə şirkətlərinin işçilərinə sığınacaq da təklif edir.
"Vanguard" qeyd edir ki, ələ keçirmə Hindistan bayrağı altında üzən "Haji Ali" gəmisinin batmasından qısa müddət sonra baş verib.
