İranın ABŞ-nin mümkün zərbələrindən mühafizə olunmaq məqsədilə hərbi və mülki aviasiya vasitələrini Pakistan və Əfqanıstana yerləşdirdiyi güman edilir.
Oxu.Az xəbər verir ki, bu barədə "CBS News" telekanalı məlumat yayıb.
Telekanalın məlumatına əsasən, İranın hərbi təyyarələri İslamabadın cənub istiqamətində yerləşən Nur Xan adlı Pakistan Hərbi Hava Qüvvələrinə məxsus bazaya aparılıb. Mənbələr həmçinin kəşfiyyat uçuşları üçün modifikasiya edilmiş İranın RC-130 təyyarəsinin də həmin bazaya göndərildiyini vurğulayıb.
Bildirilir ki, hərbi toqquşmalar başlamazdan az əvvəl İrana məxsus "Mahan Air" aviaşirkəti bir neçə təyyarəsini Kabil şəhərinə istiqamətləndirib və İranın hava sərhədləri bağlandıqdan sonra həmin təyyarələr orada saxlanılıb. Lakin Pakistanla Əfqanıstan arasında baş verən silahlı insidentlər səbəbindən təyyarələr qısa müddət sonra Əfqanıstanın İran sərhədində yerləşən Herat hava limanına gətirilib.
Buna baxmayaraq, "Taliban" hərəkatının rəsmi nümayəndəsi Zəbihullah Mücahid "CBS News"-ə verdiyi açıqlamada bu iddiaları təkzib edib.
