Bu il İranın İsrailə qarşı kiberhücumları kəskin şəkildə artıb. Oxu.Az xəbər verir ki, bu barədə "Reuters" agentliyi yüksək rütbəli İsrail təhlükəsizlik rəsmisinə istinadən məlumat yayıb.
İsrailin Milli Kibertəhlükəsizlik İdarəsinin baş direktoru Yossi Karadi bildirib ki, 2025-ci ilin iyun ayında İsrailin İrana qarşı hərbi əməliyyatları zamanı 1600-ə yaxın kiber müdaxilə qeydə alınıb. 2026-cı ilin eyni ayında bu rəqəm təxminən 4800-ə çatıb.
"Bəzi qruplar çox təcrübəlidir. Biz onlarla mübarizə apara bilərik, lakin bu məsələyə ciddi yanaşmalıyıq. Kinetik sahədən fərqli olaraq, kiberməkanda atəşkəs mövcud deyil", - deyə direktör qeyd edib.
Hücumlar İsrailin kritik infrastrukturu, mərkəzi təşkilatlar, kiçik və orta müəssisələr, eləcə də əhali tərəfindən istifadə edilən sistemlərə yönəlib. Zərərçəkənlər arasında hüquq və mühasibat şirkətləri də var.
Karadi əlavə edib ki, nüfuz edilməsi daha asan olan şirkətlər çox vaxt kompüter sistemlərinə çıxışı itirib. Lakin o, konkret ad çəkməyib.
