İtaliya hökuməti, Baş nazir Corcia Meloninin rəhbərliyi ilə, Türkiyənin "Baykar" şirkəti ilə İtaliyanın müdafiə nəhəngi "Leonardo" arasında PUA istehsalı üçün ortaq müəssisənin yaradılmasını rəsmi olaraq təsdiqləyib.
"Haber Global"in məlumatına görə, Nazirlər Şurası 50-50 pay strukturuna malik birgə şirkətə şərti icazə verib. Şirkət pilotsuz uçuş aparatlarının dizaynı, inkişafı və istehsalı ilə məşğul olacaq.
İtaliya hökuməti razılaşmaya "Qızıl Güc" mexanizmi çərçivəsində nəzarət edib. Bu mexanizm strateji sahələrdə investisiyaları yoxlamaq, veto qoymaq və xüsusi tələblər irəli sürmək hüququ verir. Şərtlərə əsasən, ortaq müəssisənin ixracı yalnız NATO və Aİ siyasətini dəstəkləyən ölkələrlə məhdudlaşdırılacaq.
Həmçinin, layihədə istifadə olunan texnologiyaların və məxfi məlumatların tam məxfiliyi təmin edilməlidir.
Xatırladaq ki, "LBA Systems" adlı ortaq şirkətin yaradılması 2025-ci ilin martında elan edilmiş, rəsmi müqavilə isə həmin ilin iyununda imzalanmışdı.
