ABŞ prezidentinin qızı İvanka Trampa qarşı sui-qəsd planlaşdırmaqda şübhəli bilinən İraq vətəndaşı Türkiyədə saxlanılıb.
Oxu.Az xəbər verir ki, bu barədə "New York Post" mənbələrə istinadən məlumat yayıb.
32 yaşlı Məhəmməd Bəkir Saad Davud əs-Saadi İranın SEPAH və "Kətaib Hizbullah" qruplaşması ilə əlaqəli olub. O, 2020-ci ildə Bağdadda ABŞ zərbəsi nəticəsində öldürülən iranlı general Qasım Süleymaninin qisasını almaq məqsədilə hücum planlaşdırıb.
Şübhəli şəxs sosial şəbəkədə İvanka Trampın Floridadakı evinin xəritəsini paylaşaraq ərəb dilində təhdidlər edib.
Əs-Saadi mayın 15-də Türkiyədə saxlanılıb və daha sonra ABŞ-yə ekstradisiya olunub.
ABŞ onu Avropa və Şimali Amerikada Amerika və yəhudi obyektlərinə qarşı hücumların təşkilində ittiham edir. O, Amsterdamda bankın yandırılması, Londonda iki yəhudiyə bıçaqlı hücum və Torontodakı ABŞ konsulluğunda atışma ilə əlaqələndirilir.
Şübhəli Bağdadda doğulub və Tehranda SEPAH xətti ilə təlim keçib. Ağ Ev isə hadisə ilə bağlı hələ şərh verməyib.
