Konqo Demokratik Respublikasında (KDR) Ebola epidemiyasının əsl miqyası rəsmi hesabatlardan xeyli böyükdür. "Sky News"-in məlumatına görə, "Oxfam" təşkilatının nümayəndələri real yoluxma hallarının açıqlanan rəqəmlərdən qat-qat çox olduğunu bildiriblər.
Səbəb kimi sanitar infrastrukturun bərbad vəziyyəti, təmiz suyun olmaması və xəstələrlə təmasda olanların izlənilməsinin çətinləşməsi göstərilib. Bundibuqyo virusunun nadir növü yayıldıqdan sonra sanitariya və gigiyena sistemləri demək olar ki, tamamilə məhv olub.
İturi əyalətindəki səhiyyə müəssisələrinin yalnız beşdəbiri lazımi təmiz su ilə təmin edilir. 140 min əhalisi olan Monqvalo şəhərində isə əhalinin cəmi 20 faizi içməli sudan istifadə edə bilir, sanitar qurğulara əlçatanlıq 25 faiz təşkil edir.
Rəsmi məlumatlara görə, ölənlərin sayı 192 nəfərə çatıb, təsdiqlənmiş yoluxma 808-ə yüksəlib. Ölüm əmsalı 23.8 faizdir. 48 nəfər sağalıb. Epidemiyanın episentri İturi əyalətidir (738 hal). Virus Şimali və Cənubi Kivu əyalətlərində də yayılmaqdadır.
