Litvada Milli Təhlükəsizlik Komissiyasının qərarı ilə bütün bələdiyyələr sığınacaqların 24 saat fəaliyyət göstərməsini təmin etməlidir.
Oxu.Az xəbər verir ki, bu barədə Litvanın milli yayımçısı LRT məlumat yayıb.
Komissiyanın təcili iclası mayın 20-də ölkədə dron insidentlərinin artması səbəbindən keçirilib. Səhər saatlarında bəzi bölgələrdə, xüsusən sərhədyanı ərazilərdə naməlum PUA aşkar edilərək hava həyəcanı elan olunub.
İclasda son hadisə zamanı xəbərdarlıq sisteminin düzgün işlədiyi qeyd olunub. Mayın 17-də Utena bölgəsində partlayıcı daşıyan dronun gecikmiş xəbərdarlığı ilə müqayisədə bu müsbət qiymətləndirilib.
Komissiya əhaliyə xəbərdarlıq mexanizminin sürətləndirilməsini tapşırıb: "Hətta təhlükə yalan olsa belə, insanları tez-tez məlumatlandıracağıq".
Litva rəsmiləri əlavə edib ki, yay sonunadək bütün radarlar vahid mərkəzləşdirilmiş sistemə inteqrasiya ediləcək.
