Fransa Prezidenti Emmanuel Makron Suriyaya səfər etmək niyyətindədir. Bu barədə Suriya hökuməti məlumat yayıb.
Makron 2024-cü ilin sonlarında Əhməd əş-Şaraanın hakimiyyətə gəlməsindən sonra Suriyaya səfər edən ilk Qərb lideri olacaq. Bu həmçinin 2009-cu ildə Nikolya Sarkozinin səfərindən bəri Fransa prezidentinin Suriyaya ilk rəsmi səfəridir.
Suriya Prezidenti Əhməd əş-Şaraanın mətbuat xidmətindən verilən bəyanatda bildirilib ki, Fransa prezidenti ikitərəfli münasibətləri gücləndirmək üçün Dəməşqə səfər edəcək. Makronu investorlar və Fransa şirkətlərinin nümayəndələrindən ibarət nümayəndə heyəti müşayiət edəcək.
Həmçinin qeyd edilib ki, Əhməd əş-Şaraa və Makron hər iki nümayəndə heyətinin iştirakı ilə dəyirmi masa keçirəcəklər.
"Al Hadath" telekanalının məlumatına görə, Suriyada hakimiyyət dəyişikliyindən sonra Xalq Şurasının iyulun 6-na planlaşdırılan ilk iclası Makronun həmin gün Dəməşqə nəzərdə tutulan səfəri səbəbindən təxirə salınıb.
