Melanoma ən aqressiv və məkrli xərçəng növlərindən biridir. Rusiyalı onkoloq Andrey Kaprin "RİA Novosti"-yə müsahibəsində xəbərdarlıq edib.
Həkimin sözlərinə görə, melanoma dəri xərçənglərinin 14%-dən çoxunu təşkil edir. Ümumi onkoloji xəstəliklər arasında isə 13-cü yerdədir.
Açıq dərili, sarışın və ya açıq gözlü insanlar, çoxsaylı xalları olanlar və ailəsində melanoma olanlar yüksək risk qrupundadır. Həmçinin immunosupressiv terapiya alanlar da risk altındadır.
Kaprin uşaq yaşlarında günəş yanıqlarının melanoma riskini artırdığını vurğulayıb. Valideynləri uşaqları günəşdən qorumağa çağırıb.
Onkoloq Suna İsakova isə "ABCDE" metodunu tövsiyə edir: asimmetriya, kənarlar, rəng, ölçü və dinamika. Xal asimmetrikdirsə, kənarları qeyri-bərabərdirsə, rəngi rəngarəngdirsə, ölçüsü 6 mm-dən böyükdürsə və ya dəyişirsə, həkimə müraciət edin.
