Milli Məclisin Avropa Parlamenti ilə əməkdaşlığın dayandırılması qərarı, uzun illər davam edən qərəzli münasibət və ikili standartlara qarşı atılmış prinsipial bir addımdır. Bu, sadəcə institusional əlaqələrin dondurulması deyil, Azərbaycanın beynəlxalq aləmdə öz milli maraqlarını qətiyyətlə müdafiə etməsinin göstəricisidir.
Milli Məclisin deputatı Mehriban Vəliyeva Oxu.Az-a açıqlamasında bildirib ki, Azərbaycan hər zaman beynəlxalq təşkilatlara və tərəfdaşlara hörmətlə yanaşıb, eyni hörməti qarşı tərəfdən gözləyir. Prezident İlham Əliyevin vurğuladığı kimi, hər bir beynəlxalq qurum Azərbaycana hörmətlə yanaşmalıdır, çünki biz onlara hörmət göstəririk. Bu qərar da həmin prinsipin parlament səviyyəsində təsdiqidir.
Uzun müddətdir ki, Avropa Parlamenti Azərbaycana münasibətdə balanslı mövqedən uzaqlaşıb. Xüsusilə Ermənistanın işğalı dövründə beynəlxalq hüququn pozulmasına və bir milyondan çox qaçqının hüquqlarının tapdanmasına adekvat reaksiya verilməməsi ciddi suallar doğurur. 44 günlük Vətən müharibəsindən sonra da qərəzli yanaşma davam edib.
COP29 kimi qlobal tədbir ərəfəsində Azərbaycana qarşı tənqid kampaniyası rəsmi Bakı tərəfindən koordinasiyalı siyasi təzyiq kimi dəyərləndirilib. Bu, etimadı tamamilə sarsıdıb. Parlamentlərarası əməkdaşlıq platformalarının siyasi təzyiq alətinə çevrilməsi qəbuledilməzdir. Buna görə də, Milli Məclis bu platformalarda iştirakı dayandırmaq qərarına gəlib.
Qərar Avropa Parlamenti ilə bütün əlaqələrin kəsilməsini, Aİ-Azərbaycan Parlament Əməkdaşlıq Komitəsində iştirakın dondurulmasını və Avronest Parlament Assambleyasında proseslərin dayandırılmasını əhatə edir. Bu, parlament diplomatiyasında dönüş nöqtəsidir.
Deputat vurğulayıb ki, Azərbaycan əməkdaşlıq qapılarını tam bağlamır. Münasibətlərin normallaşması yalnız qarşı tərəfin obyektivliyə, beynəlxalq hüquqa və qarşılıqlı hörmətə qayıtması ilə mümkündür. Bu qərar, Azərbaycanın beynəlxalq münasibətlərdə yeni mərhələyə keçdiyini və bərabərhüquqlu münasibət tələb etdiyini göstərir.
Xatırladaq ki, Avropa Parlamenti 30 aprel 2026-cı ildə Azərbaycan əleyhinə qətnamə qəbul edib. Cavab olaraq, Milli Məclis 1 may 2026-cı ildə Avropa Parlamenti ilə əməkdaşlığı dayandırıb. Həmçinin, Aİ səfiri Mariyana Kuyunciç Xarici İşlər Nazirliyinə çağırılaraq etiraz notası təqdim olunub.
