İsrailin Baş naziri Benyamin Netanyahu Livanla bağlı çərçivə sazişini "İran üçün zərbə" adlandırıb.
"Ynet"in məlumatına görə, Netanyahu Tehranın tələblərinə rəğmən, təhlükəsizlik səbəbindən İsrail qoşunlarının Cənubi Livandan çıxarılmayacağını bildirib.
Baş nazir uzun danışıqların müsbət nəticələndiyini vurğulayıb: "Ən vacibi odur ki, İsrail Livanın cənubundakı təhlükəsizlik zonasında qalır. Bu, böyük nailiyyətdir və biz bunu Hizbullah tərksilah olana qədər qoruyacağıq."
Netanyahu əlavə edib: "Bu, İran üçün ciddi zərbədir. İsrail, Livan və ABŞ onlara deyir ki, bu sizin işiniz deyil."
O, həmçinin Cənubi Livanda iki pilot zonanın yaradıldığını və Livan ordusuna əraziyə nəzarəti ələ almağa hazırlaşmağa icazə verildiyini bildirib.
İyunun 26-da ABŞ dövlət katibi Marko Rubio, İsrail və Livanın diplomatları tərəfindən beş mərhələli danışıqların yekunu olaraq çərçivə sənədi təqdim edilib. Sənəd regionda sülhə zəmin yaradacaq.
