Şimal dənizində, Danimarkaya məxsus Anholt adası sahillərində tapılan ölü balinanın üzərində GPS ötürücüsü aşkar edilməyib.
Danimarka Təbii Sərvətlər İdarəsinin nümayəndəsi Morten Abildstrem bildirib ki, heyvanın bədənində heç bir elektron cihaz tapılmayıb. O, quyruq üzgəcindən toxuma nümunəsi götürülərkən sahilə vurmuş balinaya şəxsən baxış keçirib. Nümunə ekspertiza üçün Almaniyaya göndəriləcək.
Abildstrem 95% əmindir ki, bu qozbel balinadır. Lakin 12 metrlik heyvanın böyür üstə qalması və yarıya qədər suya qərq olması növün dəqiq müəyyənləşdirilməsinə mane olur. Balina Anholt sahilindən 75 metr aralıda yerləşir və çox güman ki, bir müddət əvvəl tələf olub.
"Bild" qəzeti yazır ki, rəsmilər bu balinanın əvvəllər taleyi izlənilən "Timmi" ola biləcəyini ehtimal edirlər. Balinanın açıq dənizə buraxılmasından iki həftə keçsə də, onun yeri məlum deyil. GPS ötürücüsü siqnal vermir. Mütəxəssislər "Timmi"nin sağ qalma şansını çox aşağı qiymətləndirirlər.
