Özbəkistanın Qaşqadərya vilayətində qaz doldurma məntəqəsində baş verən partlayış nəticəsində 6 nəfər həlak olub.
Oxu.Az xəbər verir ki, bu barədə ölkənin Fövqəladə Hallar Nazirliyinin mətbuat xidməti məlumat yayıb.
İyunun 8-də yerli vaxtla 13:50-də (Bakı vaxtı ilə 12:50) Qaşqadərya vilayətinin yanğından mühafizə idarəsinə məişət qaz balonlarının doldurulduğu məntəqədə partlayış baş verməsi barədə siqnal daxil olub. Alov yerli vaxtla 14:55-də (Bakı vaxtı ilə 13:55) tamamilə lokallaşdırılıb. Hadisə nəticəsində 6 nəfər ölüb, daha 5 nəfər isə müxtəlif dərəcəli bədən xəsarətləri ilə xəstəxanaya yerləşdirilib.
İlkin məlumatlara görə, yanğın nəticəsində 4 avtomobil və 2 yeraltı yanacaq çəni ciddi ziyan görüb. Özbəkistan Prezidenti Şavkat Mirziyoyevin tapşırığı ilə xüsusi hökumət komissiyası yaradılıb. Komissiya zərərçəkənlərə yardım göstərilməsi, partlayışın səbəblərinin araşdırılması və gələcəkdə belə hadisələrin qarşısının alınması üçün tədbirlər görəcək.
