Ermənistanın baş naziri Nikol Paşinyana qarşı sui-qəsd hazırlamaqda şübhəli bilinən Mqer Mirzoyan həbs edilib.
Oxu.Az-ın Ermənistan KİV-ə istinadən verdiyi məlumata görə, bu barədə İstintaq Komitəsinin mətbuat xidmətindən bildirilib.
İlkin istintaq zamanı baş nazirə qarşı sui-qəsd hazırlayan şəxslərdən birinin kimliyi müəyyən edilib. 2024-cü ildən xarici ölkədə yaşayan Mirzoyan, azı dörd nəfərdən ibarət qrupun tərkibində baş nazirin həyatına son qoymaq məqsədilə vasitələr əldə edib.
Şəxslər kimliklərini gizlətmək üçün xüsusi geyim və maskalar alıb, baş nazirin yerləri və seçki marşrutları barədə məlumat toplayıblar. Daha sonra maskalı şəkildə videomüraciət yazaraq hədə-qorxu göstəriblər.
Mayın 16-da kompüter rabitəsi vasitəsilə canlı yayım zamanı videoyazını ələ keçirib yayımlayaraq seçkiqabağı təşviqata mane olublar.
Mirzoyana qarşı Ermənistan Cinayət Məcəlləsinin bir qrup şəxs tərəfindən qətl hazırlanması və seçki təşviqatına mane olma maddələri ilə ittiham irəli sürülüb.
