Ermənistan İstintaq Komitəsi baş nazir Nikol Paşinyana qarşı sui-qəsd hazırlayan şəxslərdən birinin kimliyini müəyyən edib.
Oxu.Az-ın Ermənistan mediasına istinadən verdiyi məlumata görə, M.M. adlı şəxs ən azı dörd nəfərdən ibarət qrupun tərkibində olub. O, zəruri geyim və maskalar alıb, Paşinyanın yerləşdiyi yer və seçkiqabağı kampaniya marşrutları haqqında məlumat toplayıb.
Qrup iştirakçıları internet platformasındakı videomateriala qeyri-qanuni giriş əldə ediblər. Video daha sonra yayımlanıb. İstintaqın versiyasına görə, bu, seçkiqabağı təşviqat görüşünün qarşısının alınmasına səbəb olub.
M.M. barəsində Cinayət Məcəlləsinin bir neçə maddəsi ilə istintaq başlanılıb. Onun saxlanılması barədə qərar qəbul edilib.
