Pentaqonun rəhbəri Pit Heqset Yeni Zelandiyanı "müftəxor" adlandırıb. O, bu ifadəni ölkənin müdafiə xərclərinin qeyri-kafi olması səbəbindən işlədib.
Oxu.Az xəbər verir ki, hərb naziri bu barədə Sinqapurda keçirilən "Şanqri-La Dialoqu" forumunda çıxış edərkən bildirib.
Pit Heqset Yeni Zelandiyanın ABŞ-nin tərəfdaşları siyahısına niyə daxil edilmədiyinə dair suala cavab verib və bu ölkənin belə statusa layiq olmadığını bildirib.
"Əgər səmimi olmaq lazımdırsa, iki faiz kifayət deyil, belə ki, iki faiz 'müftəxor' olmaq deməkdir", - deyə Pentaqon rəhbəri vurğulayıb. O əlavə edib ki, Yeni Zelandiyaya qarşı heç bir şəxsi qərəzi yoxdur.
Pit Heqsetin bu çıxışından sonra Yeni Zelandiyanın müdafiə naziri Kris Penk təhlükəsizlik sahəsinə töhfələri artırmaq və hərbi xərcləri yüksəltmək niyyətində olduqlarını bəyan edib. O, bildirib ki, bu bəyanatları şərh etməyi zəruri hesab edir. Müdafiə idarəsinin rəhbəri vurğulayıb ki, Yeni Zelandiya həm Hind-Sakit okean regionunda, həm də qlobal miqyasda daha mühüm rolu öhdəsinə götürməyə hazırdır. Onun sözlərinə görə, ölkəsi uzun onilliklər ərzində müxtəlif silahlı münaqişələrdə iştirak edib və həmişə haqlı tərəfi dəstəkləyib. Nazir bildirib ki, Yeni Zelandiya hərbçiləri hazırda Ukrayna ordusunun hazırlığında iştirak edirlər. Penk onu da əlavə edib ki, ölkə hökuməti hərbi xərclərin ÜDM-dəki payını iki dəfə artırmağı, eləcə də silahlı qüvvələrin döyüş qabiliyyətini gücləndirməyi planlaşdırır.
