Ukrayna Prezidenti Volodimir Zelenski Polşa ilə münasibətlərin gərginləşməsi səbəbindən Avropa səfərlərini Moldova üzərindən həyata keçirir.
Oxu.Az xəbər verir ki, bu barədə "Strana.ua" "Telegram" kanalında məlumat yayılıb. Dövlət başçısı əvvəllər Polşanın Jeşuv-Yasyonka hava limanından istifadə edirdi, lakin iyunun 7-də Londona Kişineu üzərindən gedib. Rəsmi səbəb açıqlanmayıb.
Bununla belə, bu hadisə Polşa-Ukrayna münasibətlərində yaranan yeni gərginlik fonunda baş verib. May ayının sonunda Zelenski Ukrayna Silahlı Qüvvələrinin bir bölməsinə "UPA qəhrəmanları" fəxri adını verib.
Bu qərar Kiyevlə Varşava arasında münaqişəyə səbəb olub. Polşada bu addım fatal səhv adlandırılıb və Zelenskinin üzr istəməli olduğu vurğulanıb. Polşa Seyminin vitse-spikeri Kşiştof Bosak Zelenskinin arzuolunmaz qonaq olduğunu deyib.
Bosak, həmçinin Ukraynanın Aİ-yə üzvlüyünün bloklanması, kreditlərin dayandırılması və "Starlink" maliyyələşdirilməsindən imtina edilməsinin tərəfdarı olduğunu bildirib.
"The European Conservative" portalı qeyd edir ki, Polşanın siyasi kursu dəyişərsə, Kiyevi daha böyük problemlər gözləyir.
