Rusiyanın müdafiə nazirinin müavini Yunus-Bek Yevkurov və Baş Qərargahın Baş Kəşfiyyat İdarəsi rəisinin birinci müavini Vladimir Alekseyev qiyam qaldıran "Vaqner" təsisçisi Yevgeni Priqojinlə danışıqlar üçün Rostov-na-Donuya gediblər.
Oxu.Az xəbər verir ki, Priqojinlə işləmiş hüquqşünas İqor Yeliseyev "Fontanka" nəşrinə müsahibəsində yeni təfərrüatları açıqlayıb.
"Ölkənin yüksəkvəzifəli şəxsləri ona zəng etməyə çalışırdılar. Daha sonra Yevkurov və Alekseyev Rostova gəldilər. Onlar rəhbəri fikrindən daşındırmağa çalışırdılar, o isə öz mövqeyini izah edirdi", - deyə Yeliseyev bildirib.
Hüquqşünasın sözlərinə görə, Priqojin hakimiyyətə təzyiq göstərməyə çalışırdı, lakin heç kimin güzəştə getməyəcəyi aydın idi. Yeliseyev güc strukturlarının nümayəndələrinə vəziyyətin qan tökülməsinə gətirib çıxarmamalı olduğunu izah etdiyini qeyd edib.
Onun sözlərinə görə, münaqişə yalnız Belarus Prezidenti Aleksandr Lukaşenkonun müdaxiləsindən sonra həll olunub. Lukaşenko Priqojinə müəyyən təminatlar verib.
Daha əvvəl Priqojinin hüquqşünası bildirmişdi ki, "Vaqner" rəhbəri üçün dönüş nöqtəsi onun cəbhəyə səfəri və sursat çatışmazlığından şikayət edən komandirlərlə görüşü olub. Yeliseyev həmçinin qeyd edib ki, Artemovskun ələ keçirilməsindən sonra "Vaqner"in silahlarının Rusiya Müdafiə Nazirliyinə təhvil verilməsi tələbi də Priqojin üçün ciddi zərbə olmuşdu.
Priqojinin qiyamı 2023-cü il iyunun 24-də baş verib. O, Rusiya Müdafiə Nazirliyinə qarşı ittihamlar irəli sürüb, daha sonra "Vaqner"in Moskvaya yürüşünə başlayıb. Bir sutka ərzində onun dəstələri Rusiyanın bir neçə regionundan keçib, həmçinin iki helikopter və bir təyyarəni vurublar.
Axşam saatlarında Priqojin kolonları geri çevirib və Lukaşenko ilə razılaşmadan sonra Belarusa yollanıb. Həmin ilin avqustun 23-də isə "Vaqner" rəhbərinin təyyarəsi Tver vilayətində qəzaya uğrayıb. Biznes-jetin göyərtəsində Priqojin, Dmitri Utkin və Valeri Çekalov da olub.
