Türkiyənin Çanaqqala şəhərində sevgilisi tərəfindən döyülən qadın hakimlə bağlı yeni detallar üzə çıxıb.
Oxu.Az xəbər verir ki, bu barədə "Haber Global" məlumat yayıb. 4-cü Ağır Cinayətlər Məhkəməsinin sədri vəzifəsində çalışmış 33 yaşlı hakim 2025-ci ilin dekabrında sevgilisi tikinti mühəndisi Burak Doğanla qısqanclıq zəminində mübahisə edib.
İddiaya görə, evində bir kişi vəkil və iki qadınla spirtli içki qəbul edən hakimi öyrənən Doğan evə gedib, qonaqları bıçaqla hədələyib, qadını yataq otağında döyüb. Xəstəxanaya çatdırılan qadının yanaq sümüyü sınıb, Doğan həbs olunub.
Araşdırmalar zorakılıqla məhdudlaşmayıb. Təhlükəsizlik kameralarından evə tez-tez girib-çıxan taksi sürücüsü diqqət çəkib. Kadir adlı sürücü ifadəsində hakimə mütəmadi olaraq həblər gətirdiyini, dərmanları başqa şəhərdən aldığını deyib. Hakim həmin dərmanların "yaşıl reseptli" olduğunu etiraf edib.
Obyektiv istintaq üçün hakim üç ay müddətinə vəzifəsindən uzaqlaşdırılıb. Qərarı öyrənən hakim məhkəmə binasında təhqir və təhdidlər səsləndirib, təhlükəsizlik əməkdaşları tərəfindən çıxarılıb.
Zorakılıq və qanun pozuntusu iddiaları ilə bağlı çoxşaxəli araşdırmalar davam edir.
