Qazaxıstan baş nazirinin müavini Kanat Bozumbayev, Aktau yaxınlığında qəzaya uğrayan AZAL təyyarəsində həlak olanların ailələrinə sığorta ödənişlərinin ediləcəyini açıqlayıb. O, brifinqdə bildirib ki, altı Qazaxıstan vətəndaşından bəziləri artıq ödənişləri alıb, bəzi hallarda isə məsələ məhkəmədədir.
Bozumbayev qeyd edib ki, ödənişlər əsasən Azərbaycan və Rusiya sığorta şirkətləri tərəfindən həyata keçiriləcək. O, vətəndaşlığından asılı olmayaraq bütün sərnişinlərin eyni təzminatı alacağını bildirib.
Xatırladaq ki, 2024-cü il dekabrın 25-də Bakı-Qroznı reysini yerinə yetirən AZAL təyyarəsi Aktau yaxınlığında qəzaya uğrayıb. Təyyarədə 67 nəfər olub, 29 nəfər sağ qalıb.
