Rusiyanın bəzi media orqanlarında və siyasi dairələrində Azərbaycana münasibətdə son dövrlər daha açıq yanaşma müşahidə olunur.
Siyasi şərhçi Ramiz Alıyev Oxu.Az-a açıqlamasında "Tsarqrad" teleqram kanalının materialını şərh edib.
O bildirib ki, sanki onlar ölkəmizin son illərdəki uğurlarını, regionda yeni siyasi reallığı və sülh mühitini həzm edə bilmirlər.
"Xüsusilə "Tsarqrad" kimi resurslarda yayımlanan materiallar göstərir ki, Moskvanın müəyyən ideoloji və informasiya çevrələri hələ də Cənubi Qafqazı dəyişmiş siyasi reallıq prizmasından deyil, köhnə geosiyasi təsir mexanizmləri kontekstində qiymətləndirməyə çalışırlar", - deyə o qeyd edib.
Bu isə regionda formalaşan yeni təhlükəsizlik arxitekturası ilə ziddiyyət təşkil edir. Azərbaycanın 2020-ci ildə Vətən müharibəsində tarixi qələbəsi və 2023-cü ildə suverenliyinin tam bərpası ilə Qarabağ məsələsi beynəlxalq hüquq çərçivəsində həll olunub.
Ermənistan rəhbərliyi də Azərbaycanın ərazi bütövlüyünü rəsmi tanıyıb. Belə şəraitdə Qarabağ mövzusunun yenidən informasiya manipulyasiyası alətinə çevrilməsi cəhdləri region reallıqlarına uyğun gəlmir.
Ekspert qeyd edib ki, bu yanaşma bütövlükdə regionda sülh və normallaşma prosesinə qarşı yönəlmiş siyasi-ideoloji xəttdir.
"Ən təhlükəli məqam odur ki, beynəlxalq hüquq baxımından bağlanmış məsələ bəzi dairələr tərəfindən gələcək təsir vasitəsi kimi saxlanılmağa çalışılır", - deyə o vurğulayıb.
Prezident İlham Əliyevin siyasəti postmünaqişə dövründə praqmatik, beynəlxalq hüquqa əsaslanan və balanslaşdırılmış xəttdir. Məqsəd dayanıqlı sülh və təhlükəsizlik sisteminin formalaşdırılmasıdır.
R.Alıyev əlavə edib ki, Zəngəzur dəhlizinin açılması perspektivi regionda yeni əməkdaşlıq mühitinin mühüm elementidir. Bu layihə Cənubi Qafqazın geoiqtisadi əhəmiyyətini artıracaq.
"Azərbaycan nə qarşıdurma siyasətinin tərəfdarıdır, nə də süni gərginliklərdə maraqlıdır. Əksinə, sabit, açıq və əməkdaşlığa əsaslanan geosiyasi məkan yaratmaq istəyir", - deyə politoloq bildirib.
Rusiyanın bəzi dairələrinin köhnə imperial düşüncə ilə postsovet məkanına yanaşması artıq region ölkələri tərəfindən qəbul edilmir.
