Şahzadə Uilyam, Kornuoll hersoqluğuna aid geniş kral mülklərinin təxminən 20 faizini satmağa hazırlaşır. Bu qərar, Böyük Britaniyada mənzil və ekoloji böhranlarla mübarizə məqsədi daşıyan 500 milyon funt sterlinq dəyərindəki planın bir hissəsidir.
"Daily Mail"-in məlumatına görə, satışdan əldə olunan 160 milyon funt sterlinq Kornuoll, Silli adaları və cənubi Londonda sərfəli mənzil layihələrinə yönəldiləcək. Hersoqluq, 2040-cı ilə qədər şəhər yaxınlığındakı torpaqlarda 10-12 min yeni ev tikməyi hədəfləyir.
Bundan əlavə, 20 milyon funt sterlinq təbiətin bərpası proqramlarına, təbiəti mühafizə təşkilatları və hökumət tərəfdaşları ilə əməkdaşlıq çərçivəsində ayrılacaq.
Atası kral olduqdan sonra hersoqluğu idarə edən Uels şahzadəsi, növbəti onillikdə milyard funt sterlinq dəyərindəki sərvətinin bir hissəsini sataraq investisiyaları əsas istiqamətlərdə cəmləşdirməyi planlaşdırır. 25-ci Kornuoll hersoqu olan Uilyam, 1 milyard funt sterlinqdən çox dəyərə malik mülklərindən ildə təxminən 23 milyon funt sterlinq gəlir əldə edir. Bu vəsait onun, Ketrinin və övladlarının rəsmi, xeyriyyə və şəxsi xərclərini qarşılayır.
