Sülh Şurası BMT-nin Fələstinli Qaçqınlara Yardım Agentliyinin (UNRWA) Qəzza zolağındakı gələcək fəaliyyətini rədd edib.
Oxu.Az xəbər verir ki, şuranın "X" sosial şəbəkəsindəki paylaşımında "Yenilənmiş Qəzzada UNRWA üçün yer yoxdur" vurğulanıb.
Bildirilir ki, Sülh Şurası fələstinlilərin davamlı münaqişə və humanitar dəstək asılılığını arxada qoyaraq yeni mərhələyə qədəm qoyur. Açıqlamada "Qəzza sakinləri daha firavan gələcəyə layiqdir" deyə qeyd edilib.
Xatırladaq ki, bir müddət öncə ABŞ rəhbərliyi BMT-yə üzv dövlətlərə müraciət edərək UNRWA-nın maliyyələşdirilməsini dayandırmağı və vəsaitləri Sülh Şurasına köçürməyi təklif etmişdi.
Qeyd edək ki, bu il yanvarın 22-də Davos Dünya İqtisadi Forumu çərçivəsində 19 dövlət Qəzzada sülhün bərpası üçün Sülh Şurasının Nizamnaməsinə imza atıb. Bu qurum İsrail və HƏMAS arasındakı razılaşmaya əsasən Qəzza zolağının idarə edilməsi üçün təşkil edilib. Gələcəkdə şuranın digər bölgələrdəki münaqişələrin həlli və qarşısının alınması istiqamətində fəaliyyət göstərə biləcəyi planlaşdırılır.
