"Taliban" mümkün etirazlardan ehtiyat edərək, Herat şəhərini və Kabilin qərb hissəsindəki Daşti Barçi rayonunu hərbi nəzarətə götürüb.
Oxu.Az-ın xəbərinə görə, bu barədə "TOLOnews Plus" "Telegram" kanalı məlumat verib.
Məlumata görə, bu ərazilər faktiki olaraq hərbi vəziyyət altındadır. Kanalın Daşti Barçidəki mənbələrindən biri bildirib ki, iyunun 12-si səhər tezdəndən etibarən "Taliban" qüvvələri avtomobil yolları boyunca yerləşiblər və onların sayı artmaqdadır.
Bütün şəhər üzrə zirehli texnikaların və silahlı qüvvələrin yerləşdirilməsi ilə yanaşı, motosikletli "Taliban" patrulları da küçələrdə hərəkət edir. Daşti Barçi rayonunun küçələrindəki patrullar sakinləri yoxlayıblar və hərəkətlərinin məqsədi barədə sorğu-sual ediblər.
Həmçinin "Afghanistan International" yazır ki, Herat sakinləri küçələrdə tanklar və artilleriya da daxil olmaqla, yüngül və ağır silahlarla gəzən yüzlərlə əsgər gördüklərini bildirirlər. İçində silahlıların olduğu hərbi maşınlar iyunun 11-dən bəri şəhərdə hərəkət edir, vətəndaşların hərəkətlərini izləyir və axtarışlar aparırlar.
Nəşrin məlumatına görə, oxşar vəziyyət Kabildə də yaranıb.
AFP agentliyi xəbər verir ki, Əfqanıstan hakimiyyəti qadınlar üçün yeni məhdudiyyətlər səbəbindən bir neçə gündür etirazların davam etdiyi Herat şəhərinə hərbi texnika cəlb edib. Yerli sakinlər iyunun 10-dan şəhərdə təhlükəsizlik qüvvələrinin yerləşdirilməsinə başlanıldığını, onların insanların telefonlarını da yoxladıqlarını bildiriblər.
Bölgədə iyunun 11-də şəhər üzrə hərbi maşınlar, silahlı polislər və kəşfiyyat agentlərinin olduğu əlavə nəzarət-buraxılış məntəqələri yaradılıb. Yerli sakinin sözlərinə görə, insanlar nümayişlər keçirmək planlarından imtina ediblər.
Xatırladaq ki, daha əvvəl Heratda qadınlar üçün yeni qaydalar dərc edilib. Qaydalar kosmetikadan istifadəyə qadağanı, corab və maskaların geyilməsini nəzərdə tutur. Bu qaydalara əməl edilmədikdə qadınları saxlanılma və həbs cəzası gözləyir.
